d’Aeschi-Männerriege Wanderig id Wynige-Bärgä
Wi jedes Johr isch die letschti Aktivität im aute Johr – d’Wanderig id Wynige-Bärge – uf ä Oberbühlchnubu z’Färrebärg. Ä stattliche Azau Männerriegeler mit es paar Froue hei sich am Morge nach äm Stefanstag ufgmacht, u bi ungwüssem Wätter dä Maraton-Marsch uf sich gno. Via Burgaeschisee hei mir der Steihof erreicht u sie de via im Houz uf ä Abstieg näbe dr Rägehaule is Sägequartier vo Rietu cho. Im Bahnhof-Beizli hei mir nach ca. angerhaub Stung üses wohlverdienti Kafi mit Gipfeli zu üs gno. Uf dr Originau-Route sie mir de wyter düre Mutzbachgrabe zum Wasserfau gloffe, u dört üses Standartfoti gschosse. Dr Wäg isch hür nid so schön gsi, wüus ke Schnee u ou nid gfrohre isch gsi. Mir hei de d’Schuh abzoge – für üse Haut ir warme Stube – wo mir bir Monika u Ruth Friedli z’Rüedisbach gmacht hei.
Das Mou isch äs Kafi mit Bäziwasser mit säubergmachte Bräzeli üs fründlich uftischet worde. Bi ifauendem Räge u Schneefau si mir de em Oberbühlchnubu zugstampfet. Dr Gipfuwy us em Rucksack het müesse glärt wärde, bevor mir dr Abstieg uf Färrebärg i Agriff gno hei. D’Rundum Ussicht wo mir au Johr uf em Chnubu hei chönne gniesse , isch hür nume i üsne Härze uf cho.
D› Ida het üs im Wilde Maa härzlech begrüesst u für drüäzwänzt Persone gnoue Schwingerröschti mit Salat u Hamme parat gha. Ou äs feins Dessärt u nes guets Kafi het nid gfäut. I ha gstunet, was die Männerriegeschar i drü Stung aues chöi trinke u verschlinge?
Nachem Schneefau – während üserer Mittagszyt – hei mir der Abstieg via Oberbühl u Leggiswil uf Wynige bi niderschlagsfeiem Wätter uf üs gno. Bim Susann i dr Linde hei mir de üse Bierdurscht usgibig glöscht. Erschti Kamerade hei de der Heiwäg mit em Bus ei Stung vor dä Höckeler a trätte.
Üse Bus isch de grad uf Buchsi düregfahre! Im italiänische Bistro hei mir scho wider möge ä Portion Teigaffe u Pizze ässe u derzu ä feine Rotwy gniesse. Mit eme Schlummertrunk hei mir de – ar Uslumpete im Rössli z’Aeschi – würklech der Schlusspunkt gsetzt, mit üserer Vereinsaktivität 2017.
Walter Aebi Aeschi
